Codaengj Gyauyuz Yozyen Ban Cuengh Gun Song Vahsaw Gawjhengz Codanzvei Sam Nyied Sam
初等教育学院2015级壮汉双语班举办三月三座谈会
Dunghsinyenz: Cau Yangzmeiz Vangz Yingjyiz
Haemh 2016 nienz 4 nyied 19 hauh, Gvangjsih Swhfan Yozyen codaengj Gyauyuz Yozyen Bouxcuengh Vwnzva Hezvei youq Ruisinghlouz 202 gyausiz banhbaenz aen codanzvei aeu “Sam Nyied Sam”guh cawjdaez. Fusuhgi dangjveij yozyen Lingz Sihyinz、fwnhdonzveij suhgi Lieng Yen、banhcujyin Cuengh Gun song vahsaw 1 ban Vangz Hanzyingh daengj lauxsae caeuq 15 nienzgaep Cuengh Gun song vahsaw daengxgyoengq doengzhag camgya le baez codanzvei neix.
Codanzvei haidaeuz, daengxgyoengq doengzhag ciengq le《Fwen Couxhek》, ndeidingq raicaix. Bouxcujciz aeu Vahcuengh gig biucinj raeuzred daeuj daxyinx hozdung byaij roengzbae, daiqlingx gyoengq doengzhag byaijhaeuj vwnzva Bouxcuengh, gamjsouh vwnzva Bouxcuengh. Ndaw codanzvei miz Cau Yangzmeiz、Fanz Suhvei、 Maz Lili sam boux doengzhag faenbied gangj le mbanjranz swhgeij youq Sam Nyied San seiz gawjhengz le gijmaz hozdung, lumjbaenz diuq faexsaux, baenzlawz guh haeuxnaengj haj saek, aendom baenzlawz daeuj caeuq gij vwnzva aendom. Lijmiz, Veiz Gyahsenz doengzhag ciengq le 《Meh Muengh Lwg Dauq》, gawqgawq cungj gamjdoengh vunz dangqmaz. BouxBoux cungj gamjsouh daengz le fungsug sibgvenq Bouxcuemgh gak cungj gak yiengh, hawj vunz simmaez. Codanzvei satlaeng, gak boux lauxsae hix faenbied gangj le gij gamjsouh caeuq roxnyinh swhgeij gvaq Sam Nyied Sam.
Raeuz dwg bouxciepswnj vwnzva Bouxcuengh, wnggai mboujduenh fazyangz swnjcienz vwnzva Bouxcuengh, hawj vwnzva Bouxcuengh ciengxlwenx hwngfat roengzbae.
