Dieg Minzcuz Sonhag Cuengh Gun Song Saw Vah
Yaek Demgya Ligliengh Moq
民族地区壮汉双语教育将添新力量
Bonjbauq siusik (gicej Cau Dwzfeih) 5 nyied 20 hauh banhaet, Gvangjsih Swhfan Yozyen Codaengj Gyauyuz Yozyen yencangj Couh Sinz- dungh daengj 5 boux bae daengz Duh- anh Yauzcuz Swciyen Disuh Cin Nanzgyangh Siujyoz, yawj hagseng ban Cuengh Gun song saw vah aen yozyen neix saed lienh cingzgvang; caemhcaiq loegguh mbangj sibinz dangzgoq Sawcuengh caeuq sibinz sizsizswngh lienhguh hwnjdangz, linghvaih cimdoiq aen yozyen gungganq Cuengh Gun song saw vah lauxsae saedsaeh cingzgvang guh saeddieg diuyenz.
Ngoenzhaenx, Couh Sinzdungh daengj dingq le dangzgoq Sawcuengh Vangz Fungmingz lauxsae hwnj haenx, Vangz Fungmingz lauxsae dwg lauxsae Sawcuengh aen siujyoz neix, gyoengqde lij dingq le sizsizswngh hwnj dangz Sawcuengh caeuq dangz Sawgun dem, vanzlij dawz gij hwnjdangz ginggvaq loeg roengzdaeuj.
Ngoenzhaenx, lij hai le aen hoihnaenghdamz he, Couh Sinzdungh daengj dingq le gij yigen caeuq genyi gyoengq siujyoz lauxsae doiq baenzlawz gungganq ndei Cuengh Gun song saw vah lauxsae. Gwnz hoihnaenghdamz, Couh Sinzdungh gyo’mbaiq Duh’anh dangdieg gyauyuz bumwnz、 hagdangz caeuq lauxsae doiq aen yozyen neix gungganq Cuengh Gun song saw vah okrengz caeuq haeujcoengh. De naeuz, sizsizswngh daeuj aen siujyoz neix lienh sonsaw, bonjlaiz couhdwg lwgnuengx dangdieg, yungh cungj fuengfap neix guh sonhag, couhdwg naemj daengz yozyen aeu vih dieg minzcuz gungganq gij vunzcaiz “roengz ndaej bae, louz ndaej youq”, engqgya ndei fugsaeh dieg minzcuz raeuz, vih minzcuz gyauyuz guh gungyen. Hoihnaenghdamz geiz- gan, lauxsae camgya haihoih haenx, haenhdanq le gij cihsiz caeuq naengzlig gyoengq sizsizswngh daeuj lienhguh sonsaw haenx, cungj naeuz neix yaek dem’ak gij ligliengh dieg minzcuz aendoih lauxsae, vih minzcuz gyauyuz gyahaeuj rengzhoengh moq.
Ciuq cam rox, gaiq ban Cuengh Gun song saw vah sizsizswngh neix dwg hagseng gaiq daih’it conhgoh siujyoz gyauyuz (Cuengh Gun song saw vah fuengyiengq) conhyez aen yozyen neix, gyoengqde 2014 nienz haeujhag, bineix 7 nyied bizyez. Aen conhyez neix hag 2 bi, hoeng daj bineix hwnj yaek gaij baenz hag 3 bi lo, aen conhyez neix dwg dinghyiengq song saw vah swhfanswngh, haeujhag gaxgonq aeu ciemdingh《Mbawhezyi Dajsuenq Gungganq Dinghyiengq Siujyoz Cuengh Gun Song Saw Vah Lauxsae Guengjsae》, bizyez le bae dieg yienzlaiz hezyi miz Cuengh Gun song saw vah siujyoz haenx, son Cuengh Gun song saw vah 8 bi doxhwnj.(本文原载2016年5月25日壮文版《广西民族报》)
在实习生上的汉语课堂中,学生积极参与互动
在南江小学老师讲授的壮文课堂中,学生上讲台唱壮语山歌
调研人员在听课
座谈会现场
调研人员与南江小学有关人员及实习生合影