2020 nienz 3 nyied 30 hauh daengz 4 nyied 12 hauh, Codaengj Gyauyuz Yozyen Siujyoz Gyauyuz conhyez ( Cuengh Gun Song Vahsaw Fueng’yiengq ) 146 boux sizsizswngh youz ndaw yozyen lauxsae dazyinx daiqlingx, faenbied haeuj daengz Nanzningz Si Yilanz Lu siujyoz, Nanzningz Si Cunghnanz Siujyoz, Nanzningz Swhfan Fusuz yozyau, guh song singhgiz gwnzvangj gyauyuz sizsiz hozdung.
Vih hawj hagseng ndaej ciuqseiz ciuq caetliengh bae guhbaenz sizsiz gunghcoz, codaengj gyauyuz yozyen ceiqdingh le gij banhfap conhyez sizsiz saedhengz mboengq fat binghraq, cungfaen leihyungh vangjloz swhyenz, gaengawq conhyez daegdiemj cujciz ceiqdingh conhyez sizsiz diuzcingj giva. Gak boux sizsizswngh gyahaeuj sizsiz banhgiz, cungfaen leihyungh 《Gunghcungh Godangz》 moix ngoenz cozyez siuj cwngzsi、 vangjloz gocwngz cizboq、dinghdingh banhgoeng yonjgen daengj bingzdaiz, gaihcanj lai cungj hingzsik vangjloz fujdauj caeuq sizsiz cijdauj gunghcoz .
Youq ganz vangjloz sizsiz, sizsizswngh nyinhcaen guh liux gak hangh sizsiz yinvu, lumjbaenz: Gaengawq gobiuj anbaiz caeuq hagseng itheij yawj Gunghcungh goqdangz, caemhcaiq guh ndei gij bitgeiq dingqgoq; Yawj ndaw ban lauxsae cizboq hwnjdangz; Moix boux sizsizswngh fujdauj 1 daengz 2 boux siujhagseng; Genj baiq 1 daengz 2 boux sizsizswngh daibyauj hwnj dangz goq goenghai ndeu; Moix aen siujcuj moix singhgiz sij bien sizsiz genjbau ndeu daengj. Gak aen sizsiz siujcuj cungj guh daengz doxbang doxbouj, cizgiz caeuq hagseng、 gyahcangj、sizsiz dazyinx lauxsae lienzhaeh, dawz swhgeij daj hagseng bienqbaenz lauxsae, dawz gij lijlun cihsiz caeuq sonhag sizcen dox giethab , lingzvued bienqdoeng, swnhleih guhliux gij hong sizsiz gyauyuz .
Lauxsae dazyinx sam aen sizsiz yozyau cungj doiq gij geiqloeg caeuq bingzlwnh dingqgoq sizsizswngh guh haenx bingzgya haemq sang, caemhcaiq hawj gyoengq sizsizswngh guh doiqwngq cijdauj; doiq gyoengqde guh gij gunghcoz gaij cozyez、sij vahbingz caeuq cam dap fujdauj daengj hix haenh mbouj dingz; doiq geij boux sizsizswngh hwnj dangz goenghai haenx, hix haengjdingh gig daih. Gij biujyienh gyoengq sizsizswngh, ndaej daengz sam aen sizsiz yozyau doengzcaez haenh ndei . Baez gyauyuz sizsiz hozdung gwnz vangj neix, gak fueng doengzcaez roengzrengz , guh ndaej swnhleih caezcup.
