Sam Yau Hezvei Caez Daeuj Comz, Dox Hag Dox Son Coi Fazcanj
Vwnz: Sung Ciuhlinz 、Cwngz Danhyingj 、Cinz Meijgyah、Fanz Yijsuij
2019 nienz 11 nyied 16 hauh, vih fungfouq vwnzva hagdangz, gyagiengz gij gyauhlouz caeuq doxdoeng gak sedonz gauhyau, yienjok gij cingsaenz yienghsiengq doxgiet cauhmoq、laebsim caeuq hoenghhwd baenaj daihhagseng. Ndaej Gvangjsih Dayoz Bouxcuengh Vwnzva Hezvei iucingj, Bouxcuengh Vwnzva Hezvei hagdangz raeuz caeuq Gvangjsih Minzcuz Dayoz gyoengq daibyauj caez bae Gvangjsih Dayoz, camgya vueddoengh lienzlag cingzngeih Bouxcuengh Vwnzva Hezvei sam aen hagdangz。
Vueddoengh lienzlag cingzngeih daj ndaw foux faexsaux vaiqvued dwk hainduj, gij daibyauj camgya vueddoengh sam aen hagdangz haenx, bouxboux cungj vuenh buhvaq Bouxcuengh mbouj doengz saek hwnjdaeuj, youq gwnz faexsaux angqyangz diuqfoux, sing faexsaux doxbungq ndeidingq raixcaix, gij ciengzmienh diuqfoux ndatfwdfwd haenx, hawj gyoengq daibyauj gak gauhyau menhmenh doxsug lo. Baez diuqfoux, gak boux daibyauj hix byaujyenj gij diuqfap swhgeij, daihgya caez gyaulouz hagsib. Diuq liux lo, Bouxcuengh Vwnzva Hezvei sam yau couh hainduj guh swyouz gyauhliuz, gij bumwnz ciznwngz doxgyawj haenx dox liujgaij , dox hagsib , gak fueng cungj ndaej souik mbouj noix .
Doeklaeng, Bouxcuengh Vwnzva Hezvei sam yau caez bae Meijli Nanzfangh camgya vueddoengh, youq ndaw vueddoengh lij hawj bouxhek daeuj daengz dieg neix haenx yienjok le gij meiliz caeuq funghcaij Bouxcuengh, doengzseiz, lij hawj gyoengq hekyouz gangjgaij baenzlawz diuq foux faexsaux cix diuq ndaej ndei, doq diuq doq iucingj daihgya caez diuq caez guh’angq.
Mbat vueddoengh neix，Bouxcuengh Vwnzva Hezvei sam yau gyalaeg le liujgaij caeuq gyaulouz, dox hag gingniemh caeuq fuengfap ndei, hawj sedonz caeuq seyenz gvanhaeh engq caenmaed, hix hawj gij gvanhaeh doengzdoih engq maenh engq ndei, doiq gij vueddoengh gawjhengz Bouxcuengh Vwnzva Hezvei gak yau mizik, vih doiqcaenh gij hong haidoeng caeuq cauhmoq Bouxcuengh Vwnzva Hezvei hagdangz raeuz miz gij cozyung doidoengh cizgiz.
