2015 Nenzgiz Ban Cuengh Gun Song Vahsaw Haihag Denjlij
初等教育学院成功举办
2015级壮汉双语班新生开学典礼
Dunghsinyenz: Vangz lihoz
9 nyied 14 hauh gvaqringz, Codaengj Gyauyuz Yozyen youq Cuisinghlouz 112 gyausiz haibanh 2015 nenzgiz Ban Cuengh Gun Song Vahsaw haihag denjlij, Gvangjsih Swhyen fusinzsiyenz Cangz Ginhswng, Gvangjsih Bouxcuengh Swcigih Gyauyuzdingh Minzcuz Gyauyuzcu Veiz Lanzmingz cucangj, Gvangjsih Minzcuz Gyauyuz Fazcanj Cunghsinh Couh Gwzyih cujyin, Gvangjsih Swhyen Gauhgyau Yenzgiusoj Yangz Cinhungz fusojcangj dem Co’gyauyen lingjdauj banhswj camgya aen haihag denjlij neix.
Youq gwnz denjlij, Cangz Ginhswng fusinzsiyenz sien gangjvah, de giengzdiuh le aen muzbyauh youqgaenj, caemhcaiq vixok, daihhagseng seizneix aeu yawjnaek laebhwnj swhdwz, doengzseiz aeu gaenx bae daezswng conhyez naengzlig, ciengjaeu guhbaenz boux lauxsae Cuengh Gun song vahsaw habgek ndeu. Riengzlaeng,Couh Gwzyih cujyin naeuz gyoengq doengzhag:Hagsib vahsaw saujsu minzcuz gig youqgaenj caeuq gungganq Cuengh Gun song vahsaw lauxsae gig gaenjgip, muengh gyoengq doengzhag aeu netsaed nyinhcaen、caenh daengx rengz hag ndei Cuengh Gun song vahsaw, guh bouxhensouj caeuq bouxswnjcienz minzcuz vwnzva.
Bouxdaiqbiuj hagseng moq aen ban Cuengh Gun song vahsaw Vangz Luyingz caeuq bouxdaiqbiuj aen ban Cuengh Gun song vahsaw bi’gvaq Cinz Yungzgunh faenbied guh le fazyenz, Vangz Luyingz naeuz, maqmuengh daengzcog yied daeuj yied ndei, Cinz Yungzgunh gangj le hagsib gingniemh.
Baez denjlij neix,vih hong sonhag Cuengh Gun song vahsaw haggeiz moq hai le aen daeuz ndei, doiq hagseng moq engq vaiq engq ndei bae liujgaij dayoz swnghhoz, mingzbeg dayoz hagsib muzbyauh miz leih, doengzseiz vih gak cungj gunghcoz moq roengz le giekdaej.
