Gvangjsih Swhfan Yozyen Gawjbanh Gaiq Daihngeih Byauhcunj Vahcuengh Singsang Doeg Doxdax

Faenzcieng : Yungz Lisi（熊利思）、Vangz Li（黄莉）、Hu Cing（胡静）

Doz : Moz Lanlan（莫兰岚）、Cinz Lingz（陈灵）、Luz Yodingz（卢学婷）

  2018 nienz 12 nyied 3 hauh, Gvangjsih Swhfan Yozyen Gaiq Daihngeih Byauhcunj Vahcuengh Singsang Doeg Doxdax youq Cangzgangh Yaugih gawjhengz. Gvangjsih Swhfan Yozyen Codaengj Gyauyuz Yozyen Dangjveij Suhgi Bungz Yinghbyauh cuzsiz baez hozdung neix. Gvangjsih Swhfan Yozyen Codaengj Gyauyuz yozyen Cuenghgun Song Vahsaw conhyez cujyin Loz Yiyenz、 Gvangjsih Minzcuz Gyauyuz Fazcanj Cungsim culij yenzgiuyenz Cinz Gizvwnz daengj sam boux conhgyah guh bingzveij. Miz ngeihcib haj boux siujyoz gyauyuz conhyez Cuenghgun song vahsaw fuengyiengq doengzhag ginggvaq genjsenj, camgya baez doxdax neix .  

  Aen doxdax neix, gyoengq doengzhag ndangdaenj buhminzcuz, bak doeg vahcuengh byauhcunj. Gij vwnzdij faenzcieng miz fwensei、sanjvwnz、gojbeij daengj, ndaw de neiyungz miz goj ndawbiengz bouxcuengh, miz gij gaisau conzdungj vwnzva bouxcuengh, miz gij gingjsaek gyaeundei mbanjcuengh, lij miz swnghhoz caeuq yinzswngh ganjvu daengj.  Haenqrem doxdax gvaq liux, 16 gaep Cuenghgun song vahsaw conhyez 3 ban Vangz Cingvwnz doeg《Seizcin》vahcuengh byauhcunj、gamjcingz haeuj uk haeuj sim, hengzdoeng daihfueng swhyienz，dued ndaej daengx hoihciengz ceiq sang 98.32 faen. Boux it daengj ciengj Banh Ciyauz lwnhnaeuz,  ciep ndaej doxdax dunghcih liux, de nyinhcaen bae genj aeu gij vwnzgauj hab’eiq hab doeg, swhgeij hoiz baenz sawcuengh, mboujduenh lienh doeg, doeklaeng cix ndaej aen cingzcik ndei neix. De nyinhnaeuz, aen cingzcik neix, mboujdan baengh gaxgonq nyinhcaen cunjbei, bingzseiz lij aeu roengzrengz hagsib cuengh yijvwnz, ndiepgyaez bonj minzcuz yijyenz vwnzva.

   Doxdax gvaq liux, Codaengj  Gyauyuz Yozyen Dangjveij Suhgi Bungz Yinghbyauh dauqngeix le gij gungyen hagseng Cuenghgun song vahsaw conhyez guh hawj yozyen caeuq yozyau gensez haenx, danqhaenh gyoengq hagseng, lij naeuz baez hozdung neix yiyi daegbied, de maqmuengh gyoengq doengzhag lai biujyienh ndei di, vih Swcigih laebbaenz 60 hopbi daging soengq faen laex gig miz sim’eiq youh miz daegsaek ndeu. Gvaqlaeng, Banh Hungzgyau lauxsae daibyauj bingzveij guh le diemjbingz. Loz Yiyenz cujyin daibyauj yozyen Cuenghgun song vahsaw conhyez caeuq Gvangjsih Swhfan Yozyen Bouxcuengh Vwnzva  Hezvei docih gyoengq lingjdauj caeuq hekgviq gvansim cihciz gij gunghcoz cuenghgun song vahsaw conhyez haenx, de maqmuengh Gvangjsih Swhfan Yozyen Bouxcuengh Vwnzva Hezvei caeuq beixnuengx yenyau lai gyauhliuz lai gapguh, doengzcaez guh ndei gij gunghcoz ciepswnj vwnzva bouxcuengh.  

  Baez hozdung neix dwg Gvangjsih Swhfan Yozyen aen genjniemh hagseng siujyoz gyauyuz conhyez Cuenghgun song vahsaw fuengyiengq hagsib byauhcunj vahcuengh baenzlawz yiengh ndeu, hix dwg aen laex soengq hawj swcigih 60 hopbi daging ndeu.