Codaengj Gyauyuz Yozyen Gaiq Daeuz Conhgoh Siujyoz
Gyauyuz Conhyez (Fuengyienq Cuengh Gun Song Vahsaw)
Gyoengq HagSeng Sizsiz Camgya “Sam Nyied Sam”
Minzcuz Hozdung
初等教育学院首届专科小学教育专业（壮汉双语方向）
实习生参加“三月三”民族活动
Fanhoiz Veiz Banghcwngz（韦帮铖）
4 nyied 1 hauh daengz 4 nyied 17 hauh, aen yozyen raeuz gyoengq sizsiz hagseng gaiq daeuz conhgoh siujyoz gyauyuz neix, gij hong gensiz daih’it duenh youq rog yozyen haenx gaenq cienzbouh guh sat lo. Youq duenh gensiz neix, cingq raeb daengz minzcuz hozdung “sam nyied sam”. Cawzok gaen ban yozsiz, sizsiz hagseng lij camgya gak cungj hozdung youz sizsiz yozyau gawjbanh haenx. Gaengawq gyoepsuenq mbouj caez, youq ndaw 30 aen sizsiz siujcuj, miz gaenh 2/3 sizsiz siujcuj camgya “Sam Nyied Sam ” minzcuz hozdung youz yozyau haibanh haenx.
4 nyied 1 hauh banringzgvaq, aen sizsiz siujcuj youq Ginhcouh Si Bwzgih haenx, camhgya le gij “Sam Nyied Sam ” vwnzva veiyenj youz Nazmungz Cin Bingzfuz Siujyoz gawjhengz neix. Sizsiz hagseng Vangz Sihbingz caeuq Luz Siujcingh lij ciep ndaej aen rapnaek sizsiz hagdangz hawj, guh bouxcujciz baez veiyenj hozdung neix. 4 nyied 6 hauh，Hozciz Si Dava Yen sizsiz siujcuj camgya gij “Sam Nyied Sam” minzcuz funghcingz canjyenj hozdung youz Dava Yen Minzyij Giz、 Luzyej Yangh Cunghsinh Siuyoz lienzhab gawjbanh. Dangz Siujvanh、Banh Siuhvwnz、Lanz Ginh、Lanz Siuhdungz daengj seiq boux sizsiz hagseng, youq ndaw hozdung singsang eu fwen《Fwen Gingqlaeuj》 caeuq 《Sam Vanj Haj Vanj Mbouj Suenq Lai》 daengj. 4 nyied 7 hauh, Dwzbauj Yen sizsiz siujcuj camgya le gij “Minzcuz Doxgiet Gyauyuz” cawjdaez hozdung youz sizsiz hagdangz Duh’anh Yangh Cunghsinh Siuyoz haibanh haenx. Ngoenz sam nyied sam, youq Laizbin Si Hinghbin Gih Vujsanh Yangh Cunghyoz, 8 boux sizsiz hagseng eu《Fwen Ging Laeuj Bouxcuengh》, vunzlai angqvauvau, hozdung hoenghhumhum ……
Gveigangj Si、Sanglinz Yen、Vujsenh Yen、Siengcouh Yen daengj gak si yienh sizsiz siujcuj gyoengq sizsiz hagseng de, cungj camgya le aen Sam Nyied Sam hozdung dangdieg sizsiz hagdangz gawjbanh haenx.
Linghvaih, 4 nyied 15 hauh, aen sizsiz siujcuj youq Sangswh Yen neix, camgya le “gaiq daihsam singsang doegsaw doxdax” youz sizsiz hagdangz Sangswh Yen Swhyangz Cin Gyanghbingz Cunh Siujyoz gawjhengz haenx.
Doiq gak boux sizsiz hagseng daeuj gangj, doenghgij hozdung neix mbouj dandan dwg baez ginglig nanz lumz ndeu，engq dwg baez lienhguh hagsib miz eiqsei gyaeraez ndeu. Youq ndaw hozdung, gyoengq sizsiz hagseng doiq vwnzva Bouxcuengh engqgya roxyiuj lo, engqgya roxnyinh minzcuz vwnzva gyaeundei, gyalai rox daengz miz cwzyin bae cienzyiengz vwnzva Bouxcuengh.
来宾实习小组
来宾实习小组2
来宾实习小组3
上林塘红三月三活动
武宣县三月三活动
武宣县三月三活动2
