壮语学习

您现在的位置: 首页 >> 小教魅力 >> 壮语学习 >> 正文

Nanzningz Swhfan Dayoz Gawjhengz Gaiq Daihngeih Singsang Doeg Vahcuengh Doxdax

文章来源: 作者:Vwnz: Lanz Veijyi、Bwz Cuyiz、Linz Lanzci Doz: Liengz Haijyinz、Lij Sinhyangz 发布时间:2020年11月23日 点击数: 字号:

2020 nienz 11 nyied 22 hauh 19:00, Nanzningz Swhfan Dayoz gaiq daihngeih singsang doeg Vahcuengh doxdax youq Suihingh louz Yenjbodingh gawjhengz. Mbat doxdax neix bingzveij lauxsae miz: Codaengj Gyauyuz Yozyen Cuengh Gun Sanghyijhi cujyin Liengz CunhlenzHi fucujyin Veiz SiuhngaiBanh Hungzgyauh lauxsaeCinz Cingz lauxsae Lij Sugenh lauxsae. Mbat neix miz lai boux hekgviq camgya, gyoengqde dwg: Codaengj Gyauyuz Yozyen Bungz Yinghbyauh suhgifujdaujyenz Veiz VwnzbingzGvangjsih Minzcuz Dayoz Minzcuz Vwnzva Swnjcienz Hezvei daibyauj caeuq yozyau raeuz sedonz daibyauj.

Baez doxdax neix caeuq gaxgonq doxbeij miz sam diemj mbouj doengz. It dwg boux vunz camgya lai lai, baez neix bauqcoh couh miz 145 vunz, mboujdan dwg Sanghyijhi, Siujgyau caeuq Cenzgoh hi hix miz hauj lai vunz camgya, daj neix couh ndaej raen gyoengq doengzhag doiq gij hozdung raeuz haenh ndei caeuq cihciz. Ngeih dwg baez doxdax neix hingzsik beij gaxgonq laiyiengh, miz bouxdog gag doeg, miz songboux guhdoih doeg, lij miz laiboux caez doegmiz yungh Vahcuengh byauhcunj doeg, hix miz yungh Vahcuengh vahdoj doeg. Sam dwg doeg gij neiyungz cungj dwg cunghvaz ginghdenj, hoiz baenz Sawgun caiq singsang doeg ok daeuj cungj nanz gvaq gaxgonq haujlai.

 Gakboux senjsouj doxbeij bonjsaeh, gyoengq bingzveij nyinhcaen hawjfaen, baez hozdung neix youq ndaw sing Liengz lauxsae gangjbingz caeuq eufwen gatsat lo. Baez doxdax neix, ndaej gamjsouh daengz gak boux doengzhag gij ndatcingz doiq Vahdoj swhgeij, gij louzlienh doiq mbanj ranz swhgeij, hix ndaej raen gij conhyez cihsiz maenhndei hagseng Sanghyijbanh.

更多
[打印文章] [添加收藏]

关闭