“ Bonjdwg rumzcin raeuj fajnaj, cix vih binghraq hawj vunz haemz. Caeklaiq bouxraeuz aen sim ndei, doengzcaez doxbang gvaq seizhoj”. Dingjhoenx binghraq gaenq daengz mwh ceiq youqgaenj lo, vunzlai yungh gij hengzdoengh bonjfaenh, hawj ciengz ciengq fuengzre binghraq neix yaek raen rongh lo. Ciuq guekgya、cwngfuj caeuq yozyau haucau, Nanzningz Swhfan Dayoz Bouxcuengh Vwnzva Hezvei daegbied youq gwnz vangj banh aen cawjdaez hozdung “Fuengzre Gaemhanh Binghraq, Bouxcuengh Vwnzva Hezvei Caez Okrengz ” ndeu, hozdung cungsim dwg “doengzcaez caemhrengz, hoenx hingz binghraq”, vih hawj daengxyau lauxsae caeuq hagseng guh ndei gij hong boiqhab fuengzre gaemhanh binghraq, doenggvaq ingjsiengq、vehdoz、sij sawlig daengj mizgven “Nanzswhda Yozswj caez hengzdoengh , aeu vwnzyi cozbinj dingj binghraq” cauxguh、 yungh sawcuengh roxnaeuz sawgun sij ndei yizgi fuengzre gaemhanh binghraq、aeu vahdoj daeuj luzci fuengzre gaemhanh binghraq sibinz dinj daengj lai cungj hingzsik, yungh saedsaeh hengzdoengh baij ok gij yienghsiengq daihhagseng Nanzswhda gamj guh、rox guh、guh ndaej baenz, gaenxmaenx cienzboq naengzliengh cingq, caemhcaiq gingq boux guh hong dingj binghraq, caeuq Vujhan caeuq Cungguek caez haenqrengz.
Vueddoengh daj 3 nyied 8 hauh hainduj doxdaeuj, gyoengq lwghag Nanzswhda cizgiz camgya, gaengawq gij conhyez daegsaek bonjfaenh, hopheux cawjdaez fuengzre gaemhanh binghraq, bae dajcauh gij cawjdaez cozbinj lai cungj hingzsik. Miz mbangj dwg geiqloeg gij saehgienh gamjdoengh caeuq gij swnghhoz gamjsiengj swhgeij mwh fat bingh, miz mbangj cix dwg doenggvaq gij cozbinj veh dozveh gangj ok le gij gietsim cizgiz fuengz raq dingj binghraq, lij miz mbangj yungh vahdoj luzci fuengzre binghraq mizgven cihsiz sibinz dinj daengj haucau vunz henz ndang, caez sim caez guh, itheij hoenx bingh, Doengh gij cozbinj gij miz minzcuz daegsaek caeuq ganjyenj naengzlig neix, cungj doenggvaq gij gunghcunghau Bouxcuengh Vwnzva Hezvei doisoengq fatbiuj, hawj engq lai vunz caez yiengjsouh, dawz gij sim gij rengz doxgiet doxcomz hwnj daeuj, sawj vunz lai engq miz saenqsim hoenxhingz binghraq.
Hozdung vanzlij guh dwk, maqmuengh hagseng daengzlai camgya haeujdaeuj, caeuq boux veiyenz Bouxcuengh Vwnzva Hezvei itheij, yungh gij rapdawz gamj guh bouxcoz, yungh gij cingsaenz yienghsiengq ngiengx gyaeuj baenaj, vih hoenx hingz binghraq ok gij rengz bonjfaenh guh ndaej daengz haenx.